هذه المسرحية تتكلم عن محاولة اسرائيل غسل دماغ بعض عرب الداخل بكونها تقدم لهم حقوق المواطنة.. في حين في الحقيقة هي اغتصبت حقوقهم وارضهم وتدرسهم تاريخها بدلا من تاريخهم وتحاول فصلهم عن اخوتهم في الشتات وتمييزهم عنهم وفي المسرحية اشارات رمزية الى البروباغندا الاسرائيليية عن الهولوكوست وحب السلام والدفاع عن النفس...
الاثنين
- هلا يا بنتي .. كيف كان يومك بالمدرسة؟
- منيح يما بس هيا بنت عمي بتزانخ علي
- وشو بتعمل يعني؟
- انا بعرف؟؟ هبل ولاد زغار
- وشو فيها يما.. منتو بنات زي بعض.. وهي بتلعب معك
- اه يما.. هي بنت عمي صحيح بس بحسش انها بتحبني.. ابصر ليش
- لا يما ما تقولي هيك ان بعض الظن اثم.. ما بيجوز... بنت عمك هاي.. من لحمك ودمك.. كيف ما بتحبك؟؟ حكي منطق.. ما هني اجو من المانيا خصوصي عشان يعيشوا معنا قد ما بيحبونا..
- اه يمكن معك حق.. انا مش عم بفهمها مزبوط... بتشكرك كتير يما لانك بتوعيني..
- طيب يلا بلا كتر حكي عاد قومي امسحي غبرة الدار
الثلاثاء
- ييي آية ليش بتعيطي هيك؟
- قالتلي انا كلبة..
- مين هاي بنت الكلب؟؟ والله لاقصف رقبتها قصف..
- هيا بنت عمي..
- هيا؟؟
- اه هيا..
- متاكدة؟
- اه والله يما.. بكذبش عليك انا
- طيب ما هي بنت عمك اكيد قصدها اشي منيح
- كيف يعني؟؟ ما فهمت..
- يعني مش الكلب وفي؟
- اه وفي
- ومش مذكور بالقرآن؟
- بعرفش.. انت ادرى..
- اه مذكور.. شفتي.. مش لازم تزعلي يعني
- طيب والحمار مذكور؟
- ليش قالت لك حمارة..؟؟؟
- اه قالت
- كمان الحمار مذكور.. ومرتين كمان
- عن جد؟؟ والله ريحتيلي بالي.. ما شاء الله عليك حافظة قران انت.. يا ريت اكون زيك
- ان شاء الله بتصيري.. ثم الحمار صبور ومطيع.. يعني اشي منيح..
- اه صح.. بس ليش بتزعلي مني اذا قلت لاختي الصغيرة حمارة..
- اه يما ثقافتنا غير.. ما تنسي هني من المانيا..
- اه صح.. مش لازم انسى..ما اهبلني كنت افهمها اهانات انا..
- لا لا ما تفهميها هيك.. ويلا حاجة تتهبلي وروحي ساعديني بالغسيل.. الغسيل ناطرك
الاربعاء
- يما يما هاتيلي كباية مي بسرعة.. رح ادوخ..
- خير يا بنتي شو صرلك ؟؟؟ ليش عم تشربي هيك وكأنو مش شايفة مي بحياتك؟؟
- هيا بنت عمي مانعتني اشرب مي في المدرسة.. قال بتقرف تشرب من وراي..
- هيك قالت؟ لا مستحيل تقول هيك.. هي بنت عمك وبتحبك..
- يعني بكذب انا يما؟؟ سمعتها بديني يلي رح ياكلهم الدود..
- بعيد الشر عنك يا بنتي.. ما تحكي هيك الله يرضى عليك.. بيكون بدها مصلحتك.. مش صوموا تصحوا؟؟
- اه بس هي بتصومش...
- هني صيامهن غير يما.. هي جاية من المانيا ما تنسي..
- طيب يما ليش دوم بتدافعي عنها ...
- حرام يما.. هيا بنت يتيمة.. مش امها انقتلت بالمانيا... بيصرش نكسر بخاطرها.
- عن جد؟؟ ليش ما قلتيلي من قبل؟
- كنت زغيرة بس اسا صار وقت اشرحلك القصة كلها.. اليوم باليل بحكيلك اياها قبل ما تنامي..
- طيب يما بتشكرك..
الخميس
- يه يه ليش اواعيك موسخات هيك.. كل يوم بتعب وبنضفلك اياهن عشان توسخيهن؟؟
- ما هو مش ذنبي.. هيا رمت علي كندرتها
- ليش شو عملتيلها وليش حتى تعملك هيك؟
- ما عملتلها اشي يما والله ما عملتلها اشي.. بس هي ماااااا بتحبني.. ماااا بتحبني..
- هي ما بتحبني.. بتزهقيش ترددي هالحكي انت.. عندك عقدة المؤامرة وعقدة الاضطهاد عفكرة..
- فكرك هيك؟ يمكن.. طيب شو تفسيرك لتصرفاتها؟
- يما بالمانيا ثقافتهن غير.. هناك الحذاء مش اهانة.. شفتيش بوش رموا عليه الحذاء قام ضحك.. هيك تسلية..
- اه صحيح.. بس ليش حبسو يلي رماه خمس سنين؟؟
- اش بدنا بالناس اسا يا اية... خلينا نشوف حالنا..
- طيب يما بس هيا قالتلي لما ضرتبني بالكندرة.. بدي اكحشك من دارنا .. انو صحيح البيت الي عايشين فيه الهن؟
- اه يما.. هذا البيت لعمك وهو اجرلنا اياه .. شفتي قديش كريم؟ لولاه كنا انا وياكي بالشارع.. عشان هيك حاج تزعليها يما.. برضاي عليك..
- بس انا بطلت اقدر احتملها يما عاد..
- لازم تصبري عليها يما.. حرام هي يتيمة.. مش حكتلك قصتها؟؟
- مبلا الله وكيلك صرت حافظتها بصم. كيف تعذبت بالمانيا وكيف قتلوا امها.. منتي كل ساعة بتحكيلي قصتها
- حرام.. مسكينة هيا..
الجمعة
- يه يه ليش خدك احمر هيك زي البندورة يا اية..
- شفت شب على الطريق يما فاستحيت منه وصار وجهي احمر زي منتي شايفة
- وينتا شفتيه وليه؟؟ وليش خد واحد بيحمر مش الاثنين؟؟
- منا بتهبل عليك يما.. شو بده يكون يعني؟؟ اكيد هيا كالعادة..
- شو عملت فيك هالمرة..
- شو عملت؟؟ ضربتني كف قدام كل الصف.. يمكن لانها بنت عمي وبتحبني..
- ايه اه الله يخليكم لبعض.. بكره انا بموت يما.. مين رح يضللك غيرها؟؟
- يعني فيش مشكلة تضربني؟؟؟
- ما هو مش ضرب هاد. مزح هاد..
- تضربني كف قدام الصف كلو وهني يضحكوا علي وبتقولي مزح
- اه مزح .. بس مزح تقيل وزناخة يعني..
- بس انو متاكدة انو مزح يعني؟؟
- اه اكيد.. هي بنت عمك وبتحبك.. وبتحب السلام
- بتحب السلام كيف عرفت؟
- مش دائما عمك بيقول انو اجا من المانيا عشان يعيش بسلام.. وبيقول نحن منحب السلام..
- بركي قصدو على سلام جارتنا؟؟
- لا يما.. هو قال السلام مش سلام
- اي سلام هاد.. وبنتو بتضربني كف كل يوم؟
- اش فيها؟؟ مش المسيح قال من ضربك على خدك الايمن فادر له الايسر
- هو قال هيك؟
- اه قال..
- يعني انا طلعت غلطانة؟
- اه طبعا.. اجيتي ماكله كف على خد واحد بس
- كان لازم ادير الثاني يما؟
- تماما يما.. مش هي بنت عمك وبتحبك.. ومش احنا منحب السلام.. ومش ديننا وصانا بالسلام؟
- كلامك مقنع يما.. منتي عارفة اني مش قوية انا بالدين زيك..
- اه الله يهديك.. بهمش بعدك زغيرة.. مع الوقت بتصيري تفهمي زيي.. يلا روحي نامي وبالليل برجع بحكيلك قصة هيا بالمانيا
السبت
- خير.. اليوم من غير شر مش عم تبكي واواعيكي مرتبين على غير عادة..
- اه ما اليوم السبت يما
- ومالو السبت؟
- السبت هيا ما بتزعجنيش ابصر ليش
- طيب عال الحمدلله.. بيطلعلك يوم اجازة. .شفتي النعمة يلي عايشين فيها
- اه معك حق. بس بتعرفي يما.. انت حكيتيلي قصة هيا الف مرة لكن ولا مرة حكيتيلي قصتي انا
- قصتك انت؟؟ ما فهمت.. هياك عايشة معي ومبسوطة شو بدك احلى من هيك
- لا بقصد قصتي وقصة عيلتي.. مين ابوي.. فين اخوتي..
- اه.. شو بدك من هالسيرة يما.. اشي بيوجع الراس.. ابوك مات.. اخوتك كل واحد منهم بمحل.. اشي بلبنان واشي بالاردن واشي بالسويد.. واشي بالحبس..
- بس الدم بيصرش مية يما مش هيك كنت تقوليلي عن هيا.. فكيف بيصير مية مع اخوتي..
- ما هو اخوتك مش اشي بيشرف.. بعدين عمك بيزعل منا ان حكينا عنهم او تواصلنا معهم..
- واش بيهمك زعلو.. ما يزعل..
- كيف بتقولي هيك؟؟ مش عيب؟؟ مش هو يلي عاطينا هالبيت يلي عايشين فيه..
- يعني اذا عاطينا هالبيت مننسى اصلنا وفصلنا يما..
- اه يما بدنا نعيش احنا.. بدنا نعيش... لازم ننساهم.. هم بميل ونحن بميل.. وكل واحد يقبع شوكه بيده...
الاحد
- يما مسكيلي ايدي مش قادرة شوف منيح وحاسة حالي رح دوخ..
- ييييييي وش سوى فيكي هيك.. ليش تحت عيونك أسود هيك؟؟
- من غيرها بنت الحرام؟
- هيا؟
- اه..
- لا اكيد مش هي.. هيا بتعملش هيك.. بتكوني غلطانة..
- انا سويت بحالي هيك يعني يما؟؟
- لا.. بس يمكن تكون دفشتك فوقعت على الارض
- يما الواحد بيوقع على راسو .. ايدو.. ركبتو.. مش عينو..
- اذا وصلت الامور لهاي المواصيل صعب اسكت بقى.. رح اتصل بابوها وبهدلو..
- اه قلي الاخرس.. منتي بتخافي منو كيف بدك تبهدليه
- طيب اسا بتشوفي.. ما بتعرفي امك لما بتنجن انت..
- اتصلت الام مع العم وقالت له: اه.. صحيح.. امرك.. اكيد حيكون هيك.. لا بقى تتكرر القصة..
- شو يما.. مبين ما بهدلتيه.. سألت اية..
- قال هي ضربتك دفاعا عن النفس.. انو انت بلشت..
- كيف يعني دفاعا عن النفس ما فهمت.. فسريلي... ضربتها بعيني على ايدها مثلا؟؟
- لا اكيد.. بس بتكوني استفزيتيها وعصبتيها.. وهي خلقها ضيق.. ما تنسي انو طفولتها بالمانيا كانت صعبة.. وهي يتيمة..
- وانا مش يتيمة يما؟؟ انا مقطوعة من شجرة ..
- وانا وين رحت؟؟
- انت الخير والبركة يما..بس انو احترنا يا قرعة من وين بدنا نبوسك..
- مين القرعة وله؟؟
- مجرد مثل هاد..
- اه فكرت.. فكرت عم تقولي عن هيا انها قرعة.. مش حلوة بحقها.. ما بيكفيها شو تعذبت بالمانيا المسكينة..
- اه صح... نسيت.. يللا اليوم بتحكيلي عشية.. وبتذكريني..
- مش لازم تنسي.. هذا اشي ما بينتسى..
- حاضر.. صحيح يما.. نسيت ما قلك.. اليوم وصلتني رسالة من اخوي بالسويد
- يا ويل امك منك.. ولك انجنيتي انتي؟ كيف بتراسلي اخوكي .. شو بيحكوا علينا الناس اسا..
- ما هو اخويي يما..
- واذا؟؟ مش زلمة يعني.. عيب بيصرش هيك يما.. هالايام صعبة وبصرش نأمن لحدا.. وولاد الحرام كتار..
- على كل انا مزعتها للرسالة
- ايه منيح ريحتيلي بالي .. لو دري عمك فيها كان قتلنا.. والله خليتي قلبي ينط من محلو.
- لا اتطمني بس قبل ما مزعها قريت شغلة ما كنت مخبرتيني عنها..
- والله؟؟؟ وش هي يما؟؟
- اخوي بيقول انو بيتنا وبيت عمي كانوا لابوي وانو عمي ماخدهم بالغصب بعد ما قتل ابوي.. صحيح هالاشي؟
- اه يما صحيح...
- وليش ما خبرتيني من قبل؟؟
- شو انا راسي كمبيوتر يما.. نسيت.. هاي شغلة قديمة.. يلا بلا كتر غلبة عاد.. قومي قوري معي كوسى.. اليوم بدو يزورنا عمك فلازم نكرمه..
- حاضر يما.. على راسي انت وعمي وبنتو .. على راسي انتو من فوق..
- الله يرضى عليك يا بنيتي ويعمك بتوب الرضا.. شفتي ما احلاكي هيك..